चेल्सीविरुद्ध ४–१ को सहज जित निकाल्दै म्यानचेष्टर युनाइटेड च्याम्पियन्स लिगमा छनोट

काठमाडौं : प्रिमियर लिगमा चेल्सीलाई पराजित गर्दै म्यानचेष्टर युनाइटेडले अर्को सिजन च्याम्पियन्स लिगमा स्थान पक्का गरेको छ । गएराति घरेलु मैदान ओल्ड ट्राफोर्डमा चेल्सीविरुद्ध ४–१ को सहज जित निकाल्दै युनाइटेड युरोपियन प्रतियोगितामा छनोट भएको हो ।

युनाइटेडका लागि कासेमिरोले छैटौं मिनेटमा पहिलो गोल गरे । यस्तै एन्टोनी मार्सियलले पहिलो हाफको इन्जुरी टाइममा गोल गर्दै अग्रता दोब्बर पारे । ब्रुनो फर्नान्डेजले ७३औं र मार्कुस रासफोर्डले ७८औं मिनेटमा गोल गरेपछि युनाइटेडले ४–० को अग्रता बनायो ।

nbsp; चेल्सीका लागि जाआओ फेलिक्सले ८९औं मिनेटमा सान्त्वना गोल गरे । जितपछि ३७ खेलबाट ७२ अंक जोडेर युनाइटेड तेस्रो स्थानमा उक्लेको छ । समान खेलबाट ७० अंक रहेको न्युकासल चौथो स्थानमा छ ।

nbsp; न्युकासल यसअघि नै च्याम्पियन्स लिगमा छनोट भइसकेको छ । च्याम्पियन म्यानचेष्टर सिटीसहित आर्सनल, म्यानचेस्टर युनाइटेड र न्युकासलले अर्को सिजन च्याम्पियन्स लिग खेल्नेछन् ।